നിയമസഭാ തിരഞ്ഞെടുപ്പ് പ്രചാരണങ്ങൾക്കിടെ പൊന്നാനി സി.പി.എമ്മിൽ ഭിന്നത രൂക്ഷമാകുന്നു. തിരഞ്ഞെടുപ്പ് ഏകോപനത്തിനായി പാർട്ടി ചുമതലപ്പെടുത്തിയ മണ്ഡലം സെക്രട്ടറി സ്ഥാനം മലപ്പുറം ജില്ലാ സെക്രട്ടറിയേറ്റ് അംഗം ടി.എം. സിദ്ദീഖ് ഒഴിഞ്ഞു. പകരം ചുമതല അഡ്വ. പി.കെ. ഖലീമുദ്ദീന് നൽകിയതായാണ് റിപ്പോർട്ട്.
മണ്ഡലത്തിൽ സ്ഥാനാർത്ഥി നിർണ്ണയവുമായി ബന്ധപ്പെട്ട് ഉയർന്നുവന്ന പ്രതിഷേധങ്ങളാണ് ഈ നാടകീയ നീക്കങ്ങൾക്ക് പിന്നിലെന്ന് കരുതപ്പെടുന്നു. എം.കെ. സക്കീറിനെ സ്ഥാനാർത്ഥിയാക്കിയതിൽ പ്രവർത്തകർക്കിടയിൽ വ്യാപകമായ അമർഷം നിലനിന്നിരുന്നു. തിരഞ്ഞെടുപ്പ് പ്രചാരണങ്ങൾ നിർണ്ണായക ഘട്ടത്തിൽ നിൽക്കെ, മണ്ഡലം സെക്രട്ടറിയുടെ ഈ പിന്മാറ്റം പാർട്ടിക്കുള്ളിലെ വിഭാഗീയത പരസ്യമാക്കുന്നതാണ്.
