വികസന കാര്യങ്ങളില് ജനാഭിപ്രായം തേടാനെന്ന പേരില് സര്ക്കാര് ഖജനാവിലെ പണം ഉപയോഗിച്ച് എല്.ഡി.എഫ് തിരഞ്ഞെടുപ്പ് പ്രചാരണം നടത്തുന്നുവെന്ന പ്രതിപക്ഷ നേതാവ് വി.ഡി. സതീശന്റെ ആരോപണം കേരള രാഷ്ട്രീയത്തില് വലിയ ചര്ച്ചകള്ക്ക് വഴിവെച്ചിരിക്കുകയാണ്. ജനാധിപത്യ സംവിധാനത്തില് ഭരണകൂടവും രാഷ്ട്രീയ പാര്ട്ടിയും തമ്മിലുള്ള അതിര്വരമ്പുകള് നേര്ത്തുവരുന്നുവെന്നതിന്റെ സൂചനയായാണ് ഈ നീക്കത്തെ രാഷ്ട്രീയ നിരീക്ഷകര് വിലയിരുത്തുന്നത്.
ജനാധിപത്യത്തില് തിരഞ്ഞെടുക്കപ്പെട്ട ഒരു സര്ക്കാര് പ്രവര്ത്തിക്കേണ്ടത് കക്ഷിരാഷ്ട്രീയത്തിന് അതീതമായിട്ടാണ്. എന്നാല്, സര്ക്കാരിന്റെ വികസന നേട്ടങ്ങള് ജനങ്ങളിലെത്തിക്കാനെന്ന വ്യാജേന, പാര്ട്ടി പ്രവര്ത്തകരെ ‘വോളണ്ടിയര്മാര്’ എന്ന പേരില് സര്ക്കാര് ശമ്പളത്തില് നിയമിക്കുന്നത് ഭരണഘടനാപരമായ ധാര്മ്മികതയ്ക്ക് നിരക്കാത്തതാണ്. സര്ക്കാര് സംവിധാനങ്ങളെ ഉപയോഗിച്ച് പാര്ട്ടിയുടെ അടിത്തറ വികസിപ്പിക്കാനും, തിരഞ്ഞെടുപ്പ് പ്രചാരണത്തിന് സര്ക്കാര് പണം ഉപയോഗിക്കാനും ശ്രമിക്കുന്നത് തിരഞ്ഞെടുപ്പ് സംവിധാനത്തെ അട്ടിമറിക്കുന്നതിന് തുല്യമാണ്.
സര്ക്കാരിന് നേട്ടങ്ങള് ജനങ്ങളോട് പറയാന് അവകാശമുണ്ട്. എന്നാല് അത് പാര്ട്ടി പ്രചാരണത്തിനുള്ള മറയായി മാറുമ്പോഴാണ് ജനാധിപത്യം ചോദ്യം ചെയ്യപ്പെടുന്നത്. വികസനത്തിന്റെ പേരില് സര്ക്കാര് ഖജനാവ് ഉപയോഗിച്ച് പാര്ട്ടി വോട്ടുകള് ഉറപ്പിക്കാനുള്ള നീക്കം, രാഷ്ട്രീയ നൈതികതയുടെയും സാമ്പത്തിക അച്ചടക്കത്തിന്റെയും ലംഘനമാണെന്ന് നിസംശയം പറയാം. തിരഞ്ഞെടുപ്പ് അടുത്തിരിക്കെ, ഇത്തരം നീക്കങ്ങള് നടത്തുന്ന സര്ക്കാരിനെതിരെ ജനങ്ങള്ക്കിടയില് അമര്ഷം പുകയുകയാണ്.
കേരളം കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന കാലഘട്ടമാണിത്. ക്ഷേമപെന്ഷനുകള് ഉള്പ്പെടെയുള്ളവ മുടങ്ങുന്ന സാഹചര്യത്തില്, ഇത്തരത്തിലുള്ള ‘പി.ആര്’ പരിപാടികള്ക്കായി കോടികള് ചെലവഴിക്കുന്നത് ധൂര്ത്തായി മാത്രമേ കാണാന് സാധിക്കൂ. ജനങ്ങളുടെ നികുതിപ്പണം വികസന പ്രവര്ത്തനങ്ങള്ക്കു പകരം, ഭരണകക്ഷിയുടെ പ്രതിച്ഛായ വര്ദ്ധിപ്പിക്കാന് ഉപയോഗിക്കുന്നത് സാമ്പത്തിക അച്ചടക്കമില്ലായ്മയുടെ ഉദാഹരണമാണ്.
സി.പി.എം പോലുള്ള ഒരു കേഡര് പാര്ട്ടി ഭരിക്കുമ്പോള്, പാര്ട്ടി സംവിധാനത്തെ സര്ക്കാര് ചെലവില് സംരക്ഷിക്കുന്നുവെന്ന ആരോപണം മുന്പും ഉയര്ന്നിട്ടുണ്ട്. സ്വന്തം അണികളെ സംരക്ഷിക്കാനും അവര്ക്ക് സാമ്പത്തിക വരുമാനം നല്കാനും സര്ക്കാര് പദ്ധതികളെ ഉപയോഗിക്കുന്നുവെന്ന പ്രതിപക്ഷത്തിന്റെ വാദം ഈ സാഹചര്യത്തില് ബലപ്പെടുന്നു. ഇത് സാധാരണക്കാരായ നികുതിദായകരോടുള്ള വെല്ലുവിളിയാണ്. കൂടാതെ , ചെലവാക്കിയ തുക തിരിച്ചടപ്പിക്കുമെന്ന വി.ഡി. സതീശന്റെ പ്രഖ്യാപനം ഉദ്യോഗസ്ഥ തലത്തില് വലിയ സമ്മര്ദ്ദം സൃഷ്ടിക്കും. സര്ക്കാര് ഉത്തരവുകള് കണ്ണടച്ച് നടപ്പാക്കുന്ന ഉദ്യോഗസ്ഥര് ഭാവിയില് ഇതിന് ഉത്തരം പറയേണ്ടി വരുമെന്ന പ്രതിപക്ഷ നേതാവിന്റെ മുന്നറിയിപ്പ്, ഭരണയന്ത്രത്തെ രാഷ്ട്രീയ ആവശ്യങ്ങള്ക്ക് ഉപയോഗിക്കുന്നതിനെതിരെയുള്ള ശക്തമായ താക്കീതാണ്.
പിണറായി സര്ക്കാര് ഇത്തരത്തില് വളഞ്ഞ വഴിയില് പ്രചാരണം നടത്തുന്നത് ഇതാദ്യമല്ല. ഔദ്യോഗിക സംവിധാനങ്ങളെ ഉപയോഗിച്ച് പാര്ട്ടി പ്രചാരണം നടത്തുക എന്നത് ഈ സര്ക്കാരിന്റെ ഒരു ശൈലിയായി മാറിയിട്ടുണ്ട്. വിവാദമായ ‘നവകേരള സദസ്സ്’ ഇതിന്റെ ഏറ്റവും വലിയ ഉദാഹരണമായിരുന്നു. കോടികള് ചെലവഴിച്ച് മന്ത്രിസഭ ഒന്നാകെ നടത്തിയ ആ യാത്ര, തിരഞ്ഞെടുപ്പ് മുന്നില് കണ്ടുള്ള രാഷ്ട്രീയ പ്രചാരണമായിരുന്നുവെന്ന് അന്നുതന്നെ വിമര്ശനമുയര്ന്നിരുന്നു. കിഫ്ബി ഫണ്ട് ഉപയോഗിച്ച് ജില്ലകള് തോറും നടത്തിയ പ്രദര്ശനങ്ങളും കലാപരിപാടികളും യഥാര്ത്ഥത്തില് വികസന ആശയവിനിമയത്തേക്കാള് ഉപരി ഭരണനേട്ടങ്ങളുടെ ഏകപക്ഷീയമായ പ്രചാരണമായിരുന്നു.
സര്ക്കാര് നടത്തുന്ന ഇത്തരം മാമാങ്കങ്ങളുടെ കരാറുകള് ആര്ക്കാണ് ലഭിക്കുന്നത് എന്നത് പരിശോധിക്കുമ്പോഴാണ് ഇതിലെ രാഷ്ട്രീയ അഴിമതി വ്യക്തമാകുന്നത്. ഊരാളുങ്കല് ഉള്പ്പെടെയുള്ള സി.പി.എം സഹയാത്രികരായ സ്ഥാപനങ്ങള്ക്കും സൊസൈറ്റികള്ക്കുമാണ് പലപ്പോഴും കോടികള് വിലമതിക്കുന്ന ഇത്തരം ഇവന്റ് മാനേജ്മെന്റ്, നിര്മ്മാണ കരാറുകള് ലഭിക്കുന്നത്. ഫലത്തില്, പൊതുഖജനാവിലെ പണം കറങ്ങിത്തിരിഞ്ഞ് പാര്ട്ടി സംവിധാനങ്ങളിലേക്കോ, പാര്ട്ടിയുമായി അടുത്ത ബന്ധമുള്ളവരിലേക്കോ തന്നെ എത്തിച്ചേരുന്നു
വികസനത്തിന്റെ മറവിലെ രാഷ്ട്രീയക്കളിയാണ് പ്രശ്നം. തുടര്ച്ചയായി രണ്ട് തവണ അധികാരത്തിലിരുന്ന് പത്ത് വര്ഷം പൂര്ത്തിയാക്കാന് പോകുമ്പോഴാണ് വികസനത്തെക്കുറിച്ച് ജനങ്ങളുടെ അഭിപ്രായം തേടാന് സര്ക്കാര് ഇറങ്ങുന്നത് എന്നതിലെ വൈരുദ്ധ്യം പ്രതിപക്ഷം ചൂണ്ടിക്കാട്ടുന്നു. ഇത് യഥാര്ത്ഥത്തില് അഭിപ്രായം തേടലല്ല, മറിച്ച് തിരഞ്ഞെടുപ്പിന് മുന്നോടിയായി സര്ക്കാരിന്റെ ‘നേട്ടങ്ങള്’ അടിച്ചേല്പ്പിക്കാനുള്ള ശ്രമമാണ്. ഖജനാവ് കാലിയാക്കുന്ന ‘പി.ആര്’ രാഷ്ട്രീയമാണിത്
‘വികസന കാര്യങ്ങളില് ജനാഭിപ്രായം തേടല്’ എന്ന പേരില് സര്ക്കാര് ഖജനാവിലെ പണം ഉപയോഗിച്ച് എല്.ഡി.എഫ് തിരഞ്ഞെടുപ്പ് പ്രചാരണം നടത്തുന്നത് വ്യാപകമായ എതിര്പ്പിന് ഇടയാക്കിയിട്ടുണ്ട്. പിണറായി സര്ക്കാരിന്റെ കഴിഞ്ഞ പത്തു വര്ഷത്തെ ‘ഇവന്റ് മാനേജ്മെന്റ്’ ഭരണശൈലിയുടെ നേര്ചിത്രമാണ് ഇതു നല്കുന്നത്. കേരളം തിരഞ്ഞെടുപ്പിലേക്ക് അടുക്കുമ്പോള് വിഷയം കേവലമൊരു രാഷ്ട്രീയ ആരോപണത്തിനപ്പുറം, സംസ്ഥാനത്തിന്റെ സാമ്പത്തിക അച്ചടക്കത്തെയും ജനാധിപത്യ യുക്തികളേയും ചോദ്യം ചെയ്യുന്നതാണ്. കേരളം ചരിത്രത്തിലെ ഏറ്റവും വലിയ സാമ്പത്തിക പ്രതിസന്ധിയിലൂടെ കടന്നുപോകുമ്പോഴാണ് ഈ ധൂര്ത്ത് എന്നതും ശ്രദ്ധേയമാണ്. ക്ഷേമപെന്ഷനുകള് മുടങ്ങുകയും വികസന പ്രവര്ത്തനങ്ങള് സ്തംഭിക്കുകയും ചെയ്യുമ്പോള്, കോടികള് ഇത്തരം പ്രചാരണങ്ങള്ക്കായി ഒഴുക്കുന്നത്. പാര്ട്ടി വക പണിയ്ക്ക് സര്ക്കാര് വക ശമ്പളം എന്ന രീതിയിലാണ് ഇതു നടപ്പാക്കുന്നത്.
ജനാധിപത്യത്തില് സര്ക്കാര് സംവിധാനങ്ങള് നിഷ്പക്ഷമായിരിക്കണം എന്നതാണ് അടിസ്ഥാന തത്വം. എന്നാല് സര്ക്കാരിന്റെ വികസന നേട്ടങ്ങള് ജനങ്ങളിലെത്തിക്കാനെന്ന പേരില് സി.പി.എം പ്രവര്ത്തകരെ ‘വോളണ്ടിയര്’മാരായി നിയമിക്കുകയും, അവര്ക്ക് പൊതുഖജനാവില് നിന്ന് വേതനം നല്കുകയും ചെയ്യുന്നത് ഗുരുതരമായ ചട്ടലംഘനമാണ്. സര്ക്കാര് നേട്ടങ്ങള് വിവരിക്കുന്ന ലഘുലേഖകള് വീടുകളില് എത്തിക്കാന് പാര്ട്ടി പ്രവര്ത്തകരെ ഉപയോഗിക്കുന്നു. ഇതിന്റെ ഫലമായി സര്ക്കാര് ചെലവില് പാര്ട്ടിക്ക് ബൂത്തുതല പ്രവര്ത്തനം നടത്താനുള്ള അവസരമൊരുങ്ങുന്നു. ജനങ്ങളുടെ നികുതിപ്പണം പാര്ട്ടി അണികളെ തീറ്റിപ്പോറ്റാന് ഉപയോഗിക്കുന്നുവെന്ന ഗുരുതരമായ ആക്ഷേപമാണ് ഉയരുന്നത്.
പിണറായി സര്ക്കാര് അധികാരത്തില് വന്നതുമുതല് കാണുന്ന ഒരു പ്രവണതയാണ് ഔദ്യോഗിക സംവിധാനങ്ങളെ ഉപയോഗിച്ചുള്ള ബൃഹത്തായ പ്രചാരണ പരിപാടികള്. മന്ത്രിസഭ ഒന്നാകെ ബസ്സില് കയറി മണ്ഡലങ്ങള് തോറും സഞ്ചരിച്ചത് ഭരണപരമായ ആവശ്യത്തേക്കാള് ഉപരി, വരാനിരിക്കുന്ന തിരഞ്ഞെടുപ്പ് മുന്നില് കണ്ടായിരുന്നു . അടിസ്ഥാന സൗകര്യ വികസനത്തിന് പണം കണ്ടെത്തേണ്ട ഏജന്സിയായ കിഫ്ബിയുടെ ഫണ്ട് ഉപയോഗിച്ച് ജില്ലകള് തോറും വലിയ പ്രദര്ശനങ്ങളും കലാപരിപാടികളും സംഘടിപ്പിച്ചു.കോടികളാണ് ഇതിനൊക്കെ വേണ്ടി ചെലവഴിച്ചത്.
ഇതിനെല്ലാം പുറമേയാണ് പി.എസ്.സി റാങ്ക് ലിസ്റ്റില് ഉള്പ്പെട്ട് വര്ഷങ്ങളായി കാത്തിരിക്കുന്ന ലക്ഷക്കണക്കിന് ഉദ്യോഗാര്ത്ഥികളെ നോക്കുകുത്തിയാക്കി, തദ്ദേശ സ്ഥാപനങ്ങളിലെ താല്ക്കാലികക്കാരെ സ്ഥിരപ്പെടുത്താന് സര്ക്കാര് നടത്തിയ നീക്കം. തദ്ദേശ തെരഞ്ഞെടുപ്പിന്റെ പെരുമാറ്റച്ചട്ടം നിലനില്ക്കെയാണ് പാര്ട്ടി അനുഭാവികളെ സ്ഥിരപ്പെടുത്താന് സര്ക്കാര് ഗൂഢനീക്കം നടത്തിയിരിക്കുന്നത്. തദ്ദേശ വോട്ടെടുപ്പിന് വെറും ആറ് ദിവസം മുമ്പ്, ഡിസംബര് മൂന്നിന് ടെക്നിക്കല് അസിസ്റ്റന്റുമാരെ സ്ഥിരപ്പെടുത്താനുള്ള റിപ്പോര്ട്ട് തേടി സര്ക്കാര് പ്രിന്സിപ്പല് ഡയറക്ടര്ക്ക് കത്ത് നല്കി. ജനാധിപത്യ മര്യാദകളെയും തെരഞ്ഞെടുപ്പ് കമ്മീഷന്റെ ചട്ടങ്ങളെയും പുല്ലുവില കല്പ്പിച്ചാണ് സര്ക്കാര് കുട്ടി സഖാക്കന്മാരെ സ്ഥിരപ്പെടുത്താന് തിടുക്കം കൂട്ടിയത്.
വികസന പ്രവര്ത്തനങ്ങളെ രാഷ്ട്രീയമായി ഉപയോഗിക്കുന്നത് തെറ്റല്ല. എന്നാല്, അതിനായി നികുതിപ്പണം ഉപയോഗിക്കുകയും, പാര്ട്ടി പ്രവര്ത്തകരെ സര്ക്കാര് സംവിധാനത്തിന്റെ ഭാഗമാക്കി മാറ്റുകയും ചെയ്യുന്നത് ജനാധിപത്യ വിരുദ്ധമാണ്. വികസന പ്രവര്ത്തനങ്ങള് ജനങ്ങളെ അറിയിക്കാന് സര്ക്കാരിന് അവകാശമുണ്ട്. എന്നാല് അത് പാര്ട്ടി പ്രചാരണത്തിനുള്ള മറയായി മാറുമ്പോഴാണ് പ്രശ്നം. സാമ്പത്തിക പ്രതിസന്ധിയില് നട്ടംതിരിയുന്ന കേരളത്തില്, വികസനത്തിന് ഉപയോഗിക്കേണ്ട കോടികള് പി.ആര് ജോലികള്ക്കും പാര്ട്ടി സംവിധാനങ്ങളെ ചലിപ്പിക്കാനും ഉപയോഗിക്കുന്നത് ജനാധിപത്യത്തോടുള്ള വെല്ലുവിളിയാണ്. സര്ക്കാര് ഖജനാവും പാര്ട്ടി ഫണ്ടും തമ്മിലുള്ള നേര്ത്ത അതിര്വരമ്പ് പിണറായി ഭരണത്തില് പൂര്ണ്ണമായും മാഞ്ഞുപോയിരിക്കുന്നു എന്നതിന്റെ തെളിവാണ് ഇപ്പോഴത്തെ സംഭവവികാസങ്ങള്.’വികസന പദ്ധതികള്ക്ക് വായ്പയെടുക്കുന്ന പണം പോലും പരസ്യത്തിനും ആര്ഭാടത്തിനും വേണ്ടി ചെലവഴിക്കുന്ന രീതി സാമ്പത്തിക പ്രതിസന്ധിയിലായ സംസ്ഥാനത്തിന് താങ്ങാവുന്നതിലും അപ്പുറമാണ്.
