ടെസ്റ്റ് പരമ്പരയിലെ സമ്പൂര്‍ണ്ണ തോല്‍വിയുടെ മുറിപ്പാടുകള്‍ മായ്ച്ച് വിജയ പ്രതാപത്തിലേക്ക് തിരിച്ചെത്താനൊരുങ്ങുന്ന ഇന്ത്യന്‍ ക്രിക്കറ്റ് ടീമിന് മുന്‍പില്‍ ഇനി ഏകദിന പരീക്ഷണം. ദക്ഷിണാഫ്രിക്കയ്ക്കെതിരായ മൂന്ന് മത്സരങ്ങളടങ്ങിയ ഏകദിന പരമ്പരയ്ക്ക് നാളെ റാഞ്ചിയില്‍ തുടക്കമാകും. ഉച്ചയ്ക്ക് 1:30 ക്കാണ് മത്സരം. പരിക്കേറ്റ ശുഭ്മാന്‍ ഗില്ലിന് പകരം കെ.എല്‍ രാഹുലിന്റെ കീഴിലാണ് ടീം അങ്കത്തിനിറങ്ങുന്നത്.
25 വര്‍ഷത്തിനുശേഷം ഇന്ത്യന്‍ മണ്ണില്‍ ടെസ്റ്റ് പരമ്പര വിജയിച്ചതിന്റെ ആവേശത്തിലാണ് ദക്ഷിണാഫ്രിക്ക ഈ പരമ്പരയ്ക്കിറങ്ങുന്നത്. എന്നാല്‍, ഏകദിനത്തില്‍ ദക്ഷിണാഫ്രിക്കയ്ക്കെതിരായ കഴിഞ്ഞ രണ്ട് പരമ്പരകളിലെ വിജയമാണ് ഇന്ത്യയുടെ ആത്മവിശ്വാസം. വ്യാഴാഴ്ച റാഞ്ചിയിലെത്തിയ ഇന്ത്യന്‍ ടീം ഇന്നലെ സ്റ്റേഡിയത്തില്‍ കഠിന പരിശീലനത്തിലായിരുന്നു. ക്യാപ്റ്റന്‍ രോഹിത് ശര്‍മയും വിരാട് കോലിയും ഏറെ നേരം നെറ്റ്സില്‍ പരിശീലനം നടത്തി.
പരുക്കേറ്റ ശുഭ്മന്‍ ഗില്ലിന് പകരക്കാരനായി കെ.എല്‍. രാഹുലിന് കീഴിലിറങ്ങുന്ന ഇന്ത്യന്‍ ടീമില്‍, ടെസ്റ്റ് പരമ്പര കളിച്ച എട്ട് താരങ്ങള്‍ മാത്രമാണുള്ളത്. ജസ്പ്രീത് ബുംറയ്ക്കും മുഹമ്മദ് സിറാജിനും വിശ്രമം അനുവദിച്ചതോടെ, പേസ് ബോളിങ്ങിലെ പ്രതീക്ഷകള്‍ അര്‍ഷ്ദീപ് സിങ്, ഹര്‍ഷിത് റാണ, പ്രസിദ്ധ് കൃഷ്ണ എന്നിവരിലാണ്. വൈസ് ക്യാപ്റ്റന്‍ ശ്രേയസ് അയ്യരുടെ അഭാവത്തില്‍ മധ്യനിര ബാറ്ററായി തിലക് വര്‍മയും ടീമിലുണ്ട്. വിവിധ ഫോര്‍മാറ്റുകളിലായി ഇന്ത്യന്‍ ടീമിനൊപ്പം 52 മത്സരങ്ങള്‍ കളിച്ചെങ്കിലും യശസ്വി ജയ്സ്വാളിന് ഇതുവരെ ഒരു ഏകദിനത്തില്‍ മാത്രമാണ് ഓപ്പണറായി ഇറങ്ങാന്‍ അവസരം ലഭിച്ചിട്ടുള്ളത്. ഇന്ത്യന്‍ ടോപ് ഓര്‍ഡറിലെ പ്രതിഭകളുടെ ബാഹുല്യമായിരുന്നു ഇതിന് കാരണം.
എന്നാല്‍, ശുഭ്മന്‍ ഗില്ലിന് പരുക്കേറ്റ സാഹചര്യത്തില്‍ രോഹിത് ശര്‍മയ്ക്കൊപ്പം ജയ്സ്വാള്‍ ഈ പരമ്പരയില്‍ ബാറ്റിങ് ഓപ്പണറായെത്തും. രണ്ട് വര്‍ഷത്തിനുശേഷം ഏകദിന ടീമില്‍ തിരിച്ചെത്തിയ ഋതുരാജ് ഗെയ്ക്വാദാണ് ബാക്കപ്പ് ഓപ്പണര്‍. ക്യാപ്റ്റന്‍ കെ.എല്‍. രാഹുലും വൈസ് ക്യാപ്റ്റന്‍ ഋഷഭ് പന്തും പ്ലേയിങ് ഇലവനില്‍ ഒന്നിച്ചുണ്ടാകുമോ എന്നതിലാണ് ക്രിക്കറ്റ് പ്രേമികളുടെ പ്രധാന ആകാംക്ഷ.
