തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ രൂപംകൊണ്ട് ശ്രീലങ്കന്‍ തീരത്തുകൂടി കടന്നുപോയ ‘ഡിറ്റ് വാ’ ചുഴലിക്കാറ്റ് രാജ്യത്ത് വന്‍ നാശനഷ്ടങ്ങള്‍ വിതച്ചു. ശക്തമായ മഴയും വെള്ളപ്പൊക്കവും മണ്ണിടിച്ചിലും നൂറോളം മരണം. ചുഴലിക്കാറ്റിന്റെ സ്വാധീനത്തില്‍ കഴിഞ്ഞ 24 മണിക്കൂറിനുള്ളില്‍ ചില പ്രദേശങ്ങളില്‍ 360 മില്ലിമീറ്റര്‍ വരെ അതിശക്തമായ മഴയാണ് രേഖപ്പെടുത്തിയത്.
മരണപ്പെട്ടവരില്‍ അധികവും മധ്യ പര്‍വതമേഖലകളിലാണ്. മണ്ണിടിച്ചിലിനെത്തുടര്‍ന്ന് ആളുകള്‍ മണ്ണിനടിയില്‍പ്പെട്ടതാണ് മരണസംഖ്യ വര്‍ദ്ധിക്കാന്‍ കാരണം. വെള്ളപ്പൊക്കത്തിലും മണ്ണിടിച്ചിലുകളിലുമായി 3,000-ത്തിലധികം വീടുകള്‍ക്ക് പൂര്‍ണ്ണമായോ ഭാഗികമായോ കേടുപാടുകള്‍ സംഭവിച്ചു. തലസ്ഥാനമായ കൊളംബോയ്ക്ക് സമീപമുള്ള കേളനി നദി കരകവിഞ്ഞൊഴുകിയതിനെ തുടര്‍ന്ന് താഴ്ന്ന പ്രദേശങ്ങള്‍ വെള്ളത്തിനടിയിലായി. റോഡുകളിലും റെയില്‍വേ ട്രാക്കുകളിലും മണ്ണിടിച്ചിലും വെള്ളക്കെട്ടും കാരണം ഗതാഗതം തടസ്സപ്പെട്ടു.
വെള്ളപ്പൊക്കത്തെത്തുടര്‍ന്ന് 18,000-ത്തിലധികം ആളുകളെ താല്‍ക്കാലിക ദുരിതാശ്വാസ ക്യാമ്പുകളിലേക്ക് മാറ്റിപ്പാര്‍പ്പിച്ചു. രക്ഷാപ്രവര്‍ത്തനങ്ങള്‍ക്കായി സൈന്യത്തെയും നേവല്‍ ബോട്ടുകളും ഹെലികോപ്റ്ററുകളും വിന്യസിച്ചിട്ടുണ്ട്. ശ്രീലങ്കയ്ക്ക് അടിയന്തര സഹായമെത്തിക്കുന്നതിനായി ഇന്ത്യ ‘ഓപ്പറേഷന്‍ സാഗര്‍ ബന്ധു’ എന്ന പേരില്‍ ദുരിതാശ്വാസ ദൗത്യം ആരംഭിച്ചു. ഇന്ത്യന്‍ നാവികസേനയുടെ ഐ.എന്‍.എസ്. വിക്രാന്ത്, ഐ.എന്‍.എസ്. ഉദയഗിരി എന്നീ കപ്പലുകള്‍ കൊളംബോയില്‍ ദുരിതാശ്വാസ സാമഗ്രികളും അവശ്യവസ്തുക്കളും കൈമാറി.
സ്ഥിതി രൂക്ഷമായതോടെ, ശ്രീലങ്കന്‍ സര്‍ക്കാര്‍ ആശുപത്രികള്‍, വൈദ്യുതി, ഇന്ധന വിതരണം തുടങ്ങിയ പ്രധാന മേഖലകളെ അവശ്യ സേവനങ്ങളായി പ്രഖ്യാപിക്കുകയും രാജ്യത്ത് ഒരു ആഴ്ചത്തേക്ക് ആരോഗ്യ അടിയന്തരാവസ്ഥ പ്രഖ്യാപിക്കുകയും ചെയ്തു.
