യൂത്ത് കോണ്ഗ്രസ് സംസ്ഥാന അധ്യക്ഷനായി ഒ ജെ ജനീഷിനെ തിരഞ്ഞെടുത്തു. നിലവില്‍ യൂത്ത് കോണ്ഗ്രസ് ഉപാധ്യക്ഷനാണ്. ബിനു ചുള്ളിയിലിനെ യൂത്ത് കോണ്ഗ്രസ് വര്‍ക്കിങ് പ്രസിഡന്റായും നിയമിച്ചു. അബിന്‍ വര്‍ക്കി, കെഎം അഭിജിത്ത് എന്നിവരെ യൂത്ത് കോണ്ഗ്രസ് ദേശീയ സെക്രട്ടറിമാരായും തെരഞ്ഞെടുത്തു.
തൃശ്ശൂര്‍ സ്വദേശിയായ ഒ. ജെ. ജനീഷ് കെ.എസ്.യുവിലൂടെയാണ് കോണ്ഗ്രസ് പ്രസ്ഥാനത്തില്‍ സജീവമായത്. പെരുമ്പാവൂര്‍ പോളിടെക്‌നിക്കിലെ കെ.എസ്.യു. യൂണിറ്റ് പ്രസിഡന്റായി തുടങ്ങിയ അദ്ദേഹം, 2007-ല്‍ കെ.എസ്.യു. മാള നിയോജകമണ്ഡലം പ്രസിഡന്റായും, 2017-ല്‍ കെ.എസ്.യു. തൃശ്ശൂര്‍ ജില്ലാ പ്രസിഡന്റായും പ്രവര്‍ത്തിച്ചു. 2010 മുതല്‍ 2012വരെ യൂത്ത് കോണ്ഗ്രസ് കൊടുങ്ങല്ലൂര്‍ നിയോജകമണ്ഡലം വൈസ് പ്രസിഡന്റായിരുന്നു. 2020 മുതല്‍ 2023 വരെ യൂത്ത് കോണ്ഗ്രസ് തൃശ്ശൂര്‍ ജില്ലാ പ്രസിഡന്റായി പ്രവര്‍ത്തിച്ച ജനീഷ് 2023-ല്‍ സംസ്ഥാന വൈസ് പ്രസിഡന്റ് പദവിയിലെത്തി.
