ന്യൂഡല്‍ഹി: ഭീകരവാദത്തെ പിന്തുണയ്ക്കുന്നതില്‍ നിന്ന് പാകിസ്ഥാന് പിന്മാറണമെന്ന് ഇന്ത്യന്‍ കരസേനാ മേധാവി ജനറല്‍ ഉപേന്ദ്ര ദ്വിവേദി മുന്നറിയിപ്പ് നല്‍കി. പാകിസ്ഥാന് ഭീകരവാദത്തെ പിന്തുണയ്ക്കുന്നത് തുടര്‍ന്നാല്‍ ശക്തമായ തിരിച്ചടി നല്‍കുമെന്നും, ഓപ്പറേഷന്‍ സിന്ദൂറില്‍ സ്വീകരിച്ച സംയമനം ഭാവിയില്‍ ഉണ്ടാകില്ലെന്നും അദ്ദേഹം വ്യക്തമാക്കി. ഓപ്പറേഷന്‍ സിന്ദൂറില്‍ പങ്കെടുത്ത സൈനികരെ അഭിനന്ദിക്കുന്ന ചടങ്ങിലായിരുന്നു കരസേനാ മേധാവിയുടെ പ്രസ്താവന.
ഭീകരവാദത്തിനെതിരെയാണ് ഇന്ത്യയുടെ പോരാട്ടം. ലോക ചരിത്രത്തിലും ഭൂമിശാസ്ത്രത്തിലും ഒരു സ്ഥാനം നിലനിര്‍ത്താന്‍ പാകിസ്ഥാന് ആഗ്രഹിക്കുന്നുവെങ്കില്‍, അവര്‍ സര്‍ക്കാര്‍ സ്‌പോണ്‍സര്‍ ചെയ്യുന്ന ഭീകരവാദം അവസാനിപ്പിക്കണം. അല്ലെങ്കില്‍ ഭൂപടം തന്നെ മാറ്റേണ്ടി വരുമെന്ന ശക്തമായ താക്കീതും കരസേനാ മേധാവി നല്‍കി. ഭീകരതയെ സഹായിക്കുന്ന പാക് നിലപാട് ഇന്ത്യയുടെ ദേശീയ സുരക്ഷയെ ബാധിക്കുന്നുവെന്ന് അദ്ദേഹം ചൂണ്ടിക്കാട്ടി. രാജ്യത്തിന്റെ അഖണ്ഡത സംരക്ഷിക്കാന്‍ സൈന്യം എല്ലാ നിമിഷവും സജ്ജമാണെന്നും സൈനികര്‍ക്ക് പൂര്‍ണ്ണ പിന്തുണയുണ്ടെന്നും അദ്ദേഹം ഉറപ്പുനല്‍കി.
ഓപ്പറേഷന്‍ സിന്ദൂറില്‍ പാകിസ്ഥാന് കേന്ദ്രീകരിച്ചുള്ള ഭീകരപ്രവര്‍ത്തനങ്ങള്‍ക്ക് ശക്തമായ തിരിച്ചടി നല്‍കാന്‍ ഇന്ത്യയ്ക്ക് കഴിഞ്ഞു. ഈ ദൗത്യത്തില്‍ പങ്കെടുത്ത ഇന്ത്യന്‍ സൈനികരുടെ ധൈര്യത്തെ അദ്ദേഹം അഭിനന്ദിച്ചു. അതേസമയം, ഓപ്പറേഷന്‍ സിന്ദൂറില്‍ ഇന്ത്യന്‍ യുദ്ധവിമാനങ്ങള്‍ പാകിസ്ഥാന് തകര്‍ത്തിട്ടില്ലെന്ന് വ്യോമസേനാ മേധാവി എയര്‍ ചീഫ് മാര്‍ഷല്‍ എ.പി. സിംഗ് നേരത്തെ വെളിപ്പെടുത്തിയിരുന്നു.
