കൊല്ലം ചവറ കുടുംബ കോടതി ജഡ്ജിക്കെതിരെ ഉയര്‍ന്ന ലൈംഗികാതിക്രമ പരാതിയില്‍ ഹൈക്കോടതി അന്വേഷണം ആരംഭിച്ചു. വിവാഹമോചന കേസിന് ഹാജരായ യുവതിയോട് ജഡ്ജി അപമര്യാദയായി പെരുമാറിയെന്നാണ് പരാതി. പരാതിക്കാരില്‍ നിന്ന് വിവരങ്ങള്‍ ശേഖരിക്കുന്നതാണ് അന്വേഷണത്തിന്റെ ആദ്യഘട്ടം. ഈ മാസം 19-നാണ് പരാതി ഉയര്‍ന്നത്. യുവതി നല്‍കിയ പരാതി ജില്ലാ ജഡ്ജി വഴി ഹൈക്കോടതിക്ക് കൈമാറുകയായിരുന്നു.
അന്വേഷണം ആരംഭിച്ചതിനെത്തുടര്‍ന്ന്, ജഡ്ജിയെ കൊല്ലം എം.എ.സി.ടി. കോടതിയിലേക്ക് സ്ഥലം മാറ്റി. ഹൈക്കോടതിയുടെ നിര്‍ദ്ദേശപ്രകാരമാണ് ഈ നടപടി. അന്വേഷണ റിപ്പോര്‍ട്ടിന്റെ അടിസ്ഥാനത്തില്‍, കേസ് അടുത്ത ചൊവ്വാഴ്ച ഹൈക്കോടതി അഡ്മിനിസ്‌ട്രേറ്റിവ് കമ്മിറ്റി പരിഗണിക്കും. അതേസമയം, ജഡ്ജിയുടെ നിയമനത്തില്‍ കൊല്ലത്തെ ബാര്‍ അസോസിയേഷനില്‍ അമര്‍ഷം പുകയുന്നതായും റിപ്പോര്‍ട്ടുകളുണ്ട്.
