മലപ്പുറത്ത് നിപ സമ്പര്‍ക്കപ്പട്ടികയില്‍ ഉള്‍പ്പെട്ടിരുന്ന സ്ത്രീ മരിച്ചു. 70 വയസ്സുകാരിയാണ് പരപ്പനങ്ങാടിയില്‍ മരിച്ചത്. മങ്കടയില്‍ നിപ ബാധിച്ച് മരിച്ച 18 വയസ്സുകാരിയുമായി ഇവര്‍ക്ക് സമ്പര്‍ക്കമുണ്ടായിരുന്നതായി ആരോഗ്യവകുപ്പ് പറഞ്ഞു. ഇരുവരും കോട്ടക്കലുള്ള ഒരു സ്വകാര്യ ആശുപത്രിയില്‍ ഒരുമിച്ച് ചികിത്സയിലായിരുന്നു ഇവരുടെ പരിശോധന ഫലം ഇപ്പോള്‍ പുറത്തു വന്നിട്ടുണ്ട്. ഇവര്‍ക്ക് നിപ നെഗറ്റീവാണ്. ഹൃദയസംബന്ധമായ രോഗങ്ങളേത്തുടര്‍ന്നാണ് ഇവര്‍ ആശുപത്രിയിലെത്തിയത്.
മങ്കടയില്‍ നിപ ബാധിച്ച് മരിച്ച പെണ്‍കുട്ടിക്കൊപ്പം ചികിത്സയിലുണ്ടായിരുന്നതിനാല്‍, ആരോഗ്യവകുപ്പിന്റെ പ്രോട്ടോക്കോള്‍ പ്രകാരം ഹൈ റിസ്‌ക് സമ്പര്‍ക്കപ്പട്ടികയില്‍ ഉള്‍പ്പെട്ടിരുന്ന സ്ത്രീയാണ് മരിച്ചത്. പരിശോധനാ ഫലം വന്നതോടെ നിപ മരണമല്ലെന്നത് വ്യക്തമാണ്. അതേസമയം സംസ്ഥാനത്ത് ഇന്നലെവരെ നിപ സമ്പര്‍ക്കപ്പട്ടികയില്‍ ആകെ 485 പേര്‍ ഉള്ളതായി ആരോഗ്യമന്ത്രി വീണാ ജോര്‍ജ് അറിയിച്ചു. മലപ്പുറം ജില്ലയില്‍ 192 പേരും കോഴിക്കോട് 114 പേരും പാലക്കാട് 176 പേരും എറണാകുളത്ത് 2 പേരും, കണ്ണൂരില്‍ ഒരാളുമാണ് സമ്പര്‍ക്കപ്പട്ടികയിലുള്ളത്. മലപ്പുറത്ത് 18 പേരാണ് ചികിത്സയിലുള്ളത്. ഒരാള്‍ ഐസിയു ചികിത്സയിലുണ്ട്. മലപ്പുറം ജില്ലയില്‍ ഇതുവരെ 42 പേരുടെ സാമ്പിളുകള്‍ നെഗറ്റീവ് ആയിട്ടുണ്ട്. പാലക്കാട് 3 പേര്‍ ഐസൊലേഷനില്‍ ചികിത്സയിലാണ്. പാലക്കാട് ജില്ലയില്‍ ഇതുവരെ 7 സാമ്പിളുകള്‍ നെഗറ്റീവ് ആയിട്ടുണ്ട്. സംസ്ഥാനത്ത് ആകെ 26 പേര്‍ ഹൈയസ്റ്റ് റിസ്‌കിലും 117 പേര്‍ ഹൈ റിസ്‌ക് വിഭാഗത്തിലും നിരീക്ഷണത്തിലാണ്. നിപ സ്ഥിരീകരിച്ച രോഗി കോഴിക്കോട് ഐസിയുവില്‍ ചികിത്സയിലാണ്.
