മുംബൈ : വരുന്ന രണ്ടുമുതല് നാലാഴ്ചയ്ക്കുള്ളില് കൊവിഡ് മൂന്നാംതരംഗം മഹാരാഷ്ട്രയെയോ മുംബൈയെയോ ബാധിച്ചേക്കുമെന്ന് സംസ്ഥാന കൊവിഡ് 19 ടാസ്ക്ഫോഴ്സിന്റെ മുന്നറിയിപ്പ്. മൂന്നാംതരംഗം കുട്ടികളെ ബാധിക്കാനുള്ള സാധ്യത കുറവാണെന്നും ടാസ്ക്ഫോഴ്സ്. കഴിഞ്ഞ മൂന്നുദിവസത്തെ ആള്ക്കൂട്ടങ്ങളെ കണിക്കിലെടുത്താണ് മുന്നറിയിപ്പ്.
കൊവിഡ് മൂന്നാംതരംഗം ഉണ്ടാകുന്ന പക്ഷം അതിനെ നേരിടാനുള്ള മുന്നൊരുക്കങ്ങള്ക്കായി മുഖ്യമന്ത്രി ഉദ്ധവ് താക്കറെയുടെ നേതൃത്വത്തില് ബുധനാഴ്ച അവലോകന യോഗം ചേര്ന്നിരുന്നു. ഈ യോഗത്തിലാണ് ടാസ്ക്ഫോഴ്സ് നിരീക്ഷണങ്ങള് പങ്കുവെച്ചത്. രണ്ടാംതരംഗത്തെ അപേക്ഷിച്ച് മൂന്നാംതരംഗത്തില് കൊവിഡ് രോഗികളുടെ എണ്ണം ഇരട്ടിയായേക്കുമെന്നും ടാസ്ക് ഫോഴ്സ് കണക്കാക്കുന്നു. ഒന്നാംതരംഗത്തില് 19 ലക്ഷം കേസുകളായിരുന്നു റിപ്പോര്ട്ട് ചെയ്യപ്പെട്ടത്. രണ്ടാംതരംഗത്തില് 40 ലക്ഷം കേസുകളും റിപ്പോര്ട്ട് ചെയ്യപ്പെട്ടിരുന്നു. നിലവില് 1.4 ലക്ഷം സജീവ കേസുകളാണുള്ളത്. ഇത് എട്ടുലക്ഷത്തിലേക്ക് എത്തിയേക്കാം. ആദ്യ രണ്ടുതരംഗങ്ങള്ക്ക് സമാനമായി മൂന്നാംതരംഗത്തിലും പത്തുശതമാനം കേസുകള് കുട്ടികളില്നിന്നോ യുവാക്കളില്നിന്നോ റിപ്പോര്ട്ട് ചെയ്യപ്പെട്ടേക്കാമെന്നും സംഘം വിലയിരുത്തുന്നു.
രണ്ടാം തരംഗം അവസാനിച്ച് നാലാഴ്ചയ്ക്കുള്ളില് യു.കെയ്ക്ക് മൂന്നാംതരംഗത്തെ നേരിടേണ്ടി വന്നു. കരുതലോടെയും കൊവിഡ് സാഹചര്യത്തിന് യോജിക്കുന്ന പെരുമാറ്റവും പുലര്ത്താത്തപക്ഷം നമ്മളും സമാന അവസ്ഥയിലെത്തിയേക്കുമെന്ന് ടാസ്ക്ഫോഴ്സ് അംഗം ഡോ ശശാങ്ക് ജോഷി പറഞ്ഞു.