യൂത്ത് കോണ്‍ഗ്രസിന്‍റെ ‘യൂത്ത് കെയര്‍’ ആശയത്തില്‍ പങ്കാളിയായി നടന്‍ മോഹന്‍ലാലും. കൊവിഡ് പ്രതിരോധപ്രവര്‍ത്തനങ്ങളില്‍ സജീവമായ ആരോഗ്യവകുപ്പ് ഉദ്യോഗസ്ഥ സിന്ധുവിനെ മോഹന്‍ലാല്‍ ഫോണില്‍ വിളിച്ച് അഭിനന്ദിച്ചു. കൊല്ലം ചവറ പന്മനയില്‍ വീട്ടില്‍ നിരീക്ഷണത്തിലുള്ളവരുടെ ഉത്തവരാദിത്തം സിന്ധുവിനായിരുന്നു. ഇവരെ ആദ്യം യൂത്ത് കോണ്ഗ്രസ് നേതാക്കള്‍ ഫോണില്‍ വിളിക്കുകയും പിന്നീട് മുന്‍മന്ത്രി ഷിബു ബേബി ജോണുമായി സംസാരിക്കാന്‍ അവസരമൊരുക്കുകയും ചെയ്തു. തുടര്‍ന്ന് അദ്ദേഹം മോഹന്‍ലാലിന് ഫോണ്‍ കൈമാറുകയായിരുന്നു. സ്വന്തം ആരോഗ്യവും കുടുംബത്തിന്റെ ആരോഗ്യവും ശ്രദ്ധിക്കണമെന്നും സമാനതകളില്ലാത്ത പ്രവൃത്തിയാണ് ആരോഗ്യപ്രവര്‍ത്തകര്‍ ചെയ്യുന്നതെന്നും അദ്ദേഹം പറഞ്ഞു.
