മുക്കം: വയനാട് ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി പ്രിയങ്ക ഗാന്ധിയുടെ തെരഞ്ഞെടുപ്പ് പ്രചാരണാര്‍ഥം ഇന്ന് 3.15ന് നിലമ്പൂര്‍ നിയജക മണ്ഡലത്തിലെ ചന്തക്കുന്നില്‍ നടക്കുന്ന പൊതു യോഗത്തില്‍ കോണ്‍ഗ്രസ് അഖിലേന്ത്യ പ്രസിഡന്റ് മല്ലികാര്‍ജുന്‍ ഖാര്‍ഗെ പങ്കെടുക്കും. ഇന്ന് ഉച്ചയോടെ കോഴിക്കോട് വിമാനത്താവളത്തില്‍ എത്തുന്ന ഖാര്‍ഗെ ഹെലികോപ്റ്റര്‍ മാര്‍ഗം നിലമ്പൂരിലെത്തും.
ഒളിമ്പ്യനും ഹരിയാന നിയമസഭയിലെ കോണ്‍ഗ്രസ് എം.എല്‍.എയുമായ വിനേഷ് ഫോഘട്ടും പരിപാടിയില്‍ പങ്കെടുക്കും. രാവിലെ 10.45ന് ഏറനാട് നിയോജക മണ്ഡലത്തിലെ അകമ്പാടത്ത് നടന്ന കോര്‍ണര്‍ യോഗമായിരുന്നു ഇന്നത്തെ പ്രിയങ്ക ഗാന്ധിയുടെ ആദ്യ പരിപാടി. തുടര്‍ന്ന് ഉച്ചയ്ക്ക് 12ന് നിലമ്പൂര്‍ നിയോജക മണ്ഡലത്തിലെ പോത്തുകല്ലില്‍ നടക്കുന്ന കോര്‍ണര്‍ യോഗത്തിനു ശേഷം 3.15ന് ചന്തക്കുന്നില്‍ നടക്കുന്ന പൊതു യോഗത്തില്‍ മല്ലികാര്‍ജ്ജുന്‍ ഖാര്‍ഗെയോടൊപ്പം പ്രിയങ്ക ഗാന്ധി പങ്കെടുക്കും.