കല്‍പ്പറ്റ: വയനാട് ദുരിതബാധിത മേഖലയിലേക്ക് അവശ്യസാധനങ്ങളുമായി പോയ യൂത്ത് കോൺഗ്രസ് പ്രവർത്തകരെയും വാഹനങ്ങളെയും കണ്ണൂർ കൊട്ടിയൂർ ചെക്ക് പോസ്റ്റിൽ പോലീസ് തടയുന്നതായി പരാതി. യൂത്ത് കോൺഗ്രസ് സംസ്ഥാന ജനറൽ സെക്രട്ടറി വി. രാഹുൽ കണ്ണൂർ ജില്ലാകളക്ടർക്ക് പരാതി നൽകി. കഴിഞ്ഞ ദിവസം വയനാട്ടിലേക്ക് അവശ്യ സാധനങ്ങളുമായി പോയ തളിപ്പറമ്പ് നിയോജകമണ്ഡലം കമ്മിറ്റിയുടെ വാഹനം ഉൾപ്പെടെയാണ് കൊട്ടിയൂരിൽ പോലീസ് തടഞ്ഞത്. ഡിവൈഎഫ്ഐ ഉൾപ്പടെയുള്ള സംഘടനയുടെ പ്രവർത്തകരെ വയനാട്ടിലേക്ക് പോകാൻ അനുവദിക്കുന്ന പോലീസ് ബോധപൂർവം യൂത്ത് കോൺഗ്രസ് പ്രവർത്തകരെ തടയുകയായിരുന്നുവെന്ന് തളിപ്പറമ്പ് നിയോജക മണ്ഡലം പ്രസിഡന്‍റ് അമൽ കുറ്റിയാട്ടൂർ പറഞ്ഞു.