തിരുവനന്തപുരം : സുപ്രീംകോടതിയില് ലാവലിന് കേസ് സംബന്ധിച്ച കൂടുതല് രേഖകള് നല്കാന് സാവകാശം ആവശ്യപ്പെട്ട സി.ബി.ഐയുടെ നടപടി ദുരൂഹമാണെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്. ഈ കേസില് സി.ബി.ഐ തുടര്ച്ചയായി മോദി സര്ക്കാരിന്റെ സമ്മതത്തോടെ ഒത്തുകളി നടത്തുകയാണ്. 2018 ന് ശേഷം സുപ്രീംകോടതിയുടെ പരിഗണനയില് വന്ന ലാവലിന് കേസ് ഇതുവരെ 21 തവണയാണ് മാറ്റിവച്ചത്. മുഖ്യമന്ത്രി ഉള്പ്പെട്ട ഈ കേസ് ഇത്രയും തവണ മാറ്റിവയ്ക്കുന്നത് സുപ്രീംകോടതിയുടെ ചരിത്രത്തിലാദ്യമാണ്.
കേസ് പരിഗണിച്ചപ്പോള് അടിയന്തര പ്രാധാന്യത്തോടെ വാദം കേള്ക്കണമെന്ന് നിലപാടെടുത്ത സിബിഐ ആണ് ഇപ്പോള് വീണ്ടും നാടകീയമായി ചുവടുമാറ്റം നടത്തിയത്. ഇതിന് പിന്നില് സിപിഎം ബിജെപി ധാരണയുണ്ട്. സിപിഎമ്മും ബിജെപിയും തമ്മിലുള്ള അന്തര്ധാര സജീവമാണ്. സിബിഐയുടെ സംശയാസ്പദമായ പിന്മാറ്റം ഇരുവരും തമ്മിലുണ്ടാക്കിയ തെരഞ്ഞെടുപ്പ് ധാരണയുടെ അടിസ്ഥാനത്തിലാണോ? ഏത് ദുഷ്ടശക്തികളുമായി ചേര്ന്നും കോണ്ഗ്രസിനെ പരാജയപ്പെടുത്താനാണ് മുഖ്യമന്ത്രി ശ്രമിക്കുന്നതെന്നും എന്നാലത് വിലപ്പോകില്ല. വിശ്വാസ്യതയ്ക്ക് പേരുകേട്ട സിബിഐയെ രാഷ്ട്രീയ ലക്ഷ്യം വച്ചുകൊണ്ട് അസ്ഥിരപ്പെടുത്താന് ശ്രമിക്കുന്നത് അംഗീകരിക്കാന് കഴിയില്ലെന്നും മുല്ലപ്പള്ളി പറഞ്ഞു.