കോഴിക്കോട് : കേന്ദ്ര-സംസ്ഥാന സര്‍ക്കാരുകള്‍ക്കെതിരെ രൂക്ഷവിമര്‍ശനവുമായി കെ.മുരളീധരന്‍ എം.പി. മോദി സർക്കാർ ആകാശം വിൽക്കുമ്പോൾ പിണറായി സർക്കാർ കടൽ വിൽക്കാനൊരുങ്ങുകയാണെന്ന് അദ്ദേഹം പറഞ്ഞു. കടലിന്‍റെ മക്കളോട് സർക്കാർ ചെയ്തത് അവർ ഒരിക്കലും മറക്കില്ല. വരുന്ന തെരഞ്ഞെടുപ്പിൽ ഇതിനുള്ള ഫലം ഇടതുമുന്നണിയ്ക്ക് ലഭിക്കും. എടച്ചേരിയിൽ സി.പി.എം അക്രമത്തിൽ പ്രതിഷേധിച്ച് സംഘടിപ്പിച്ച ജനാധിപത്യ സംരക്ഷണ സദസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
യു.ഡി.എഫിലെ സീറ്റ് വിഭജന ചർച്ചകൾ രണ്ട് ദിവസത്തിനുള്ളിൽ പൂർത്തിയാകും. പി.എസ്.സി ഉദ്യോഗാർഥികളെ സർക്കാർ വഞ്ചിക്കുകയാണ് ചെയ്തത്. പെരുമാറ്റച്ചട്ടം നിലവിൽ വന്നതിനാൽ ചർച്ചപോലും പൂർത്തീകരിക്കാൻ കഴിയാത്ത സ്ഥിതിയാണ്‌ സർക്കാരിന് ഉള്ളതെന്നും അദ്ദേഹം പറഞ്ഞു. യു.ഡി.എഫിൽ നിന്ന് മറുകണ്ടം ചാടിയ ജെ.ഡി.എസ് ചക്രശ്വാസം വലിക്കുകയാണെന്നും മുരളീധരൻ ചൂണ്ടിക്കാട്ടി.