കണ്ണൂർ: കർണാടക സർക്കാരിനെ വീഴ്ത്താൻ ബിജെപി നേതാക്കള്‍ മൃഗബലി നടത്തിയെന്ന വെളിപ്പെടുത്തലില്‍ കർണാടക രഹസ്യാന്വേഷണ വിഭാഗം കണ്ണൂരിൽ അന്വേഷണം നടത്തുന്നു. പൂജ നടന്നതായി സംശയിക്കുന്ന തളിപ്പറമ്പ്, മാടായി മേഖലകളിലാണ് അന്വേഷണം. കർണാടക സർക്കാരിനും മുഖ്യമന്ത്രി സിദ്ധരാമയ്യയ്ക്കും തനിക്കുമെതിരെ കേരളത്തിൽ മൃഗബലി ഉള്‍പ്പെടെയുള്ള ശത്രുഭൈരവ യാഗം നടക്കുന്നതായി കർണാടക ഉപമുഖ്യമന്ത്രി ഡി.കെ. ശിവകുമാർ ആരോപിച്ചിരുന്നു. രാഷ്ട്രീയ വൈരാഗ്യം തീർക്കാൻ കർണാടകയിലെ ചില നേതാക്കളാണ് ഇത്തരം നീക്കം നടത്തുന്നതെന്നും ശിവകുമാർ പറഞ്ഞു. ഇതിനെ തുടർന്നാണ് അന്വേഷണം. അതേസമയം ഒരു മാസത്തിനിടെ എച്ച്.ഡി. കുമാരസ്വാമിയും, മറ്റൊരാളും മാടായിലെ ക്ഷേത്രത്തിൽ എത്തിയിരുന്നതായി സൂചനയുണ്ട്. വിവിധ ക്ഷേത്രങ്ങളിലെ പൂജാരിമാരെയും, തന്ത്രിമാരെയും അന്വേഷണ ഉദ്യോഗസ്ഥർ നേരിൽ കണ്ട് സംസാരിച്ചു.