കല്‍പ്പറ്റ: വയനാട് സുൽത്താൻ ബത്തേരിയിൽ വിതരണത്തിന് തയാറാക്കിയ ഭക്ഷ്യക്കിറ്റുകൾ പിടികൂടി. 1500 കിറ്റുകളാണ് രഹസ്യവിവരത്തിന്‍റെ അടിസ്ഥാനത്തിൽ പോലീസ് കസ്റ്റഡിയിലെടുത്തത്. അവശ്യസാധനങ്ങൾക്കൊപ്പം വെറ്റിലയും ചുണ്ണാമ്പും അടക്കമുള്ള വസ്തുക്കളും ബത്തേരിയിലെ മൊത്തവിതരണ സ്ഥാപനത്തിന് മുന്നിൽ നിന്നു പിടിച്ചെടുത്ത കിറ്റുകളിൽ ഉണ്ട്. ആദിവാസി കോളനികളിൽ വിതരണം ചെയ്യാൻ ബിജെപി തയാറാക്കിയതാണ് കിറ്റുകൾ എന്നാണ് ആരോപണം. നേരത്തെ 800 കിറ്റുകൾ കൂടി കയറ്റി പോയിരുന്നതായും ബിജെപി നേതാവ് മദൻലാലാണ് ഓർഡർ നൽകിയതെന്നും കടയുടമ പറഞ്ഞു. അതേസമയം എവിടേക്ക് നൽകാനുള്ളതാണെന്ന് അറിയില്ല എന്നാണ് കിറ്റുകൾ കയറ്റിയ ലോറിയുടെ ഡ്രൈവർ നൽകിയ മൊഴി.